يوم مع احسن ناس

واخيرا وبعد عناء ,تقرر ان يكون اللقاء الشهري الثاني في البورصة ,مهما كان تفاؤلي فلم اكن اتوقع انه يكون بالجمال والحميمية دي
والله فعلا انت بتتكلم مع الناس كانهم عشرة عمر وكانك تعرفهم من زمن
كلمت ايمن راسبوتين واتفقنا اننا نتقابل في التحرير الساعة سبعة الا ربع,والراجل بصراحة عمل واجب تمام لانه ساب عربيته ونزل ركب المترو علشان يقابلني,ورحنا انا وهو علي مكان اللقاء
احلي ناس متجمعة
كان هناك سمراء النيل-اي حاجة بقي ودي طبعا حبيبة الكل ,وكانت قاعدة بتاخد فلوس الاشتراكات,وتجديد الاشتراك ,اتفقنا نخليها تقعد علي الترابيزة علشان لو البوليس جه يقولوا هيا الزعيمة
وياسمين سكاي لايت ,صاحبة الفكرة واللي بذلت جهد علشان تجمعنا كلنا,فكر متحرر وعقل كبير,وما شاء الله عليها عارفة طب وكانت بتجادل في الدكاترة اللي معانا انا اقترح عليها انها تقدم علي ماجستير علطول
الاب الروحي لينا بقي كان الرائع فعلا استاذنا حسني سليمان ,اللي جه بعد وصولنا بشوية,ما شاء الله عليه انا عجبتني جدا قدرته علي التواصل ,بصراحة يعني لو حد تاني في مكانه كان هيقول ايه العيال دي,انا ايه اللي هايوديني ,ومع اني كنت اصغر الموجودين لكني سعدت جدا بتركيزه واهتمامه بكلامي ,وبصراحة اداني ثقة في نفسي من اول الاجتماع, واول ما سمع اسم مدونتي بصلي كده وقالي اه انثي ,بجد بجد فنان راقي وعقلية واعية جدا
اما بقي الباشا اللي فرحت جدا بيه احمد شقير ,مش معقولة يا جماعة علي الرغم انه في بداية الاربيعينيات,الا انه عقل وروح شاب عشريني ,ايه الدماغ العالية دي ,انا غيرت مكاني علشان اروح اقعد جنبه,ومن اكتر الشخصيات اللي سعدت بيها
ايمن راسبوتين اللي فضل كده ساكت طول اللقاء ,شكله مباحث وكان هو اللي عمال يصور وفضل واقف
تقريبا علشان لو جت كبسة يهرب ,بس جه في الاخر وفتح بقي شاب ابيض جدا من جواه علي الرغم من صمته
حبيب قلبي بقي واللي حسيت انه صاحبي من زمان محمد باشا حامد ,اول مادخلت عليه فعرفني بنفسي فروزن لف,قولتله بتاع تامر حسني قالي اه قولتله حبيب قلبي ,محمد عاقل جدا ودمه خفيف جدا وضحكته رائعة
ومحمود باشا صاحبه اللي ان شاء الله هيبقي مدون ,لا هو فعلا بقي مدون مع انه كان ساكت شوية كده
اسامة صاحب مدونة الدبور اللي كنت فاكره راجل كبير طلع شاب زي الورد راجل برضو بس سنه صغير,وموتني علي نفسي من الضحك حتة سكر ودكتور قد الدنيا ,ويا سلام بقي علي طرائفه التحكيمية لما كان حكم
ايهاب باشا صاحب مدونة ايجلز اللي تولي مسئولية دفتر الحضور واللي جمع فيه اسامي ولينكات المدونين ,شاب طيب جدا ومتحمس للتدوين ولفكرة الاجتماع
اما بقي ايلاري صاحب مدونة حد فاهم حاجة فده من الناس اللي دماغهم كيفتني بصراحة متحضر جدا ,بيحترم الاراء ,اقترح اقتراح حلو اوي وهو اننا نعمل يوم للصداقة ,معلش بقي يا مان انا اعترضت لان عيد الحب بتجيب فيه هدية واحدة لكن عيد الصداقة هتجيب كام هدية بقي,انا اهزر طبعا,ياريت الفكرة تتنفذ ,بجد ايلاري انسان محترم اوي,ومن الناس اللي شجعتني برضو
والفنان المستقبلي بقي احمد حداد ,بيحب التصوير جدا وهو موهوب فعلا ,شاب اول ما تشوفه تحس انه صاحبك الانتيم بسيط في تعامله فكره كبير,
عنده خبرات كتير متحمس برضو للتدوين جدا من الشخصيات العزيزة جدا عليا , واهم حاجة بقي اننا روحنا مع بعض ههههههههه
محمد مدونة مصر هي امي جنني بصراحة مش عارف ازاي واحد يجمع بين البساطة لدرجة فظيعة والفكر المستنير جدا جدا ,محمد مبتسم دائما اما بيتكلم تلاقي شخص مثقف جدا واسع الافق بيتكلم معاك ,وبرضو طيب اوي اوي ودمه خفيف جداجدا
بيشوي ذي الاين اللي كان هادي اوي في الاول ,لكن بعد فترة لقينا شخص تاني ,حد مخه كبير بيتكلم بطلاقة ,وافكاره مترتبة بيبحث عن الصداقة والعلاقات في حياته,مع انه بيتواصل حلو جدا بس الظاهر انه حظه وحش مع الناس
واللي كنت اوي هازعل اوي لو ماجاش مايكل محسن ,خريج الاقتصاد والعلوم السياسة ,اللي مش لاقي نفسه في الشغل لسه,وكان نفسه اتعرف عليه من زمان ,شخص متفتح اوي وفكرة كويس جدا
واللي كان مضهدني جدا ابراهيم معايا مدونة انا وانا ,ههههههههههه ابراهيم بيكتب قصة وعضو جماعة مغامير الادبية ,امتني له التوفيق ,ابراهيم
مش بيتكلم كتير ,يعني علي قد السؤال بس ,بس برضو فاق في الاخر واحنا مروحين
قابلنا عدد من المدونين لكن لم يسعدني الحظ لكي اتعرف عليهم من قرب وهم محمد رؤوف صاحب مدونة كلمة
وصاحب مدونة كيف تحيي الموتي اللي افتكرني بنقل الحاجات عاااااااااااااااااااااااااااا والله يا باشا انا اللي كاتبها كلها
يوم اكثر من رائع ان شاء الله الاجتماع الشهري هيبقي اول جمعة من كل شهر ,بس هنفوت شهر مارس
ياريت كل المدونين ينورونا ,والي حضروا الاجتماع سعدت جدا بيكم كلكم ,واحترامكم للافكار والاشخاص وتقبلكم لي علي الرغم من اني اصغركم سنا
*ترتيب الاشخاص مالوش دلالة معينة يعني اللي جه في بالي

حسني سليمان

http://hosny45.blogspot.com/

احمد شقير

http://shokeir.blogspot.com/

ياسمين

http://amyasser.blogspot.com/

حد فاهم حاجة-ايلاري

http://yme1.blogspot.com/

محمد

http://misr-hya-omi.blogspot.com/

اسامة

http://dabbor.blogspot.com/

بيشوي

http://alien-besho.blogspot.com/

ايهاب

http://hoba28.blogspot.com/

ابراهيم معايا

http://anaweana.blogspot.com/

احمد حداد

http://ahmedhelmasry.blogspot.com/

محمد حامد فروزن لف

http://m-rashed.blogspot.com/

مايكل محسن

http://strugglingmichealitoo.blogspot.com/

ايمن فاروق

http://raspoutine1.blogspot.com/

محمد رؤوف

http://kelmetfagoumy.blogspot.com/

كيف تحيي الموتي

http://almawta.blogspot.com/

سمراء النيل

http://anooojy.blogspot.com/