Sunday, January 28, 2007

التاج بس مش الملكي


وصل الي سيادتنا نحن عمرو احمد تاج من المدونة العزيزةعاشقة الوطن ومطلوب الاجابة عليه

اية اللي حيحصل لايميلك لما تموت ؟
من اولها كده موت,اكيد هايموت معايا , والناس بقي هاتفضل تبعت ايميلات واوفلاين وفاكريني منفضلهم والنبي حد يبقي يبلغهم

اديت الباس وورد لحد قبل كده؟
لا طبعا, بس الواد محمد اخويا بيحاول يشوفه بس ماعرفش لغاية دلوقتي, يعني لا

لو اه كانت طبيعة علاقتك بيه اية؟
علاقة غير موجودة اساسا

اسمك؟
عمرو احمد

اسم الدلع المشهور وسط اصحابك؟
يعني ممكن ميرو

عمرك؟
19 سنة و3 شهور و27 يوم

برجك؟
برج العظماء الميزان وهما سموه برج العظماء علشان انا اتولدت فيه(ماحدش يضرب)

مجال دراستك؟
كلية تربية قسم انجليزي عام -جامعة عين شمس

شخصيتك نوعها ايه؟
ستة سلندر,يعني ممكن نقول دماغي ناشفة شويتين, وبحب التحدي, وواثق في نفسي(بعد ربنا طبعا


السفر بالنسبة لك؟
حاجة زي الفل, متعة طبعا بحبه جدا

المود بتاعك؟
اكيد ماليش مود ثابت يعني حسب الاحداث,بس في الغالب الدنيا زي الفل


وقت فراغك بتعمل فيه ايه؟
القراءة والنت واصحابي طبعا

الاكلة المفضلة؟
ممكن نقول اكتر حاجة ورقع العنب والمكرونة بالباشميل وصينية الرقاق

الصفات اللي خدتها من بابا؟
يعني العصبية,عزة النفس

الصفات اللي خدتها من ماما؟
اصل هي برضو عصبية ,ممكن نقول بعد النظر والتمهل

اكتر 6 حاجات بتكرهها؟
النظام الحاكم
النفاق
الخيانة
التناكة
جورج بوش
الغبااااااااء الغباااااااااااااااء

اكتر 6 حاجات بتحبها؟
اكيد ربنا والنبي
ماما وبابا ومحمد اخويا
اصحابي
القراءة
كرة القدم والاهلي
القراءة وانيس منصور وكاظم الساهر ونزار قباني

الشغل بالنسة لك؟
حاليا وقت فراغ في الاجازة واكتساب خبرات,لكن مستقبلا دوامة الواحد بيتطحن فيها علشان يكون نفسه ويجيب عيال يصرف عليها

ايه الكمبيوتر والانترنت بالنسبة لك؟
عالم تاني ناس تانية,متنفس الواحد بيقول اللي هو عاوزه,وحاجة بتاكل الوقت,وبلاقي عليه كل اللي انا عاوزه

وامرر التاج ده لكل من:اسلام (خطوة عزيزة)
نادين(نادو)
بين الامل واليأس
انسانة
الكلام نوعان
يا مراكبي
mony the angel
michael

غربة وطن (مها).

توتا u make me feel


Wednesday, January 24, 2007

مجلس الشعب..........فووووووووووووووووووو



"لا يلدغ المؤمن من جحر واحد مرتين "
بصراحة بدأت اشك ان انا مؤمن,اصلي اتلدغت اكتر من مرتين ,ومحرمتش برضو
يابني بلاش ,يابني ابعد عنه برضو مصمم
انا مالي ومال مجلس الشعب
كل مرة اقول انا مش هاتفرج عليه تاني لكن مباحرمش
وكل مرة اتخانق مع الحاج والحاجة
اصلي بصراحة مباقدرش امسك نفسي
وزي ماحضراتكم عارفين نواب الوطني يعصبوا التلج
دول جابولي المرارة علي صغر

الدكتور:عندك كام سنة يابني؟
انا:عشرين الاحتة يا دكتور
الدكتور:المرارة تعبانة يا حبيبي
قولي يابني
انت زملكاوي؟؟
انا:بعد الشر دانا اهلاوي حتي النخاع
الدكتور(متمتا بأسي):يا بختك
انا:نعم؟؟؟؟؟
الدكتور (بعصبية):يووووه خلينا في اللي احنا فيه
(نسيت اني لاحظت جريدة الزمالك علي مكتبه)
الدكتور :انت مصري صح
انا :لا من جزر القمر
الدكتور:ياريت ياخويا تلاقي مرارتهم سليمة مش زي الغلابة بتوعنا
انت بتتفرج علي مجلس الشعب يا حبيبي؟
انا:ساعات والله يادكتور
الدكتور:هو ده اقفش ,ليه يابني كده دانتا لسه صغير
بلاش يا حبيبي
نص اللي بيجولي هنا زملكاوية والنص التاني بيتفرجوا علي المجلس الموقر
اما بقي اللي بيتابع الاتنين مابيلحقش ييجي هنا
اصل عزرائيل بيروحله اسهل
انا:طب اعمل ايه يعني
الدكتور:ممنوع منعا باتا مشاهدة اي مجلس لا شعب ولا شوري ولا مجلس محلي
ولا حتي قعدة عرب

تصفيق حاد
وصوت عالي:موافقة

الحوار وهمي,
بعد الشر عني
مع الاعتذار لكل الزملكاوية

Wednesday, January 17, 2007


هييييييييييييييييييه


وخلصنا امتحانات


وعقبال اللي ماخلصوش لسه


يخلصوا


يااااااااااااااااااااه


هم وانزاح


انا دلوقتي مش قادر اكتب


الامتحانات اثرت علي عقلي


يعني المفروض مافكرش لمدة اسبوع


بصراحة حاسس ان مخي خلص


ربنا يكرم بقي


وعقبال عندكم


المرة دي عاوزكم تدعوا اوي


اوعو حد مايدعيش