مصر لسه حلوة

انك تصحي الصبح ووالدتك تدعيلك وانت خارج ربنا يسهلك يابني

وتستنيي الاوتوبيس ولا الميكروباص اللي بيتاخر كل يوم ,والمترو وزحمته والناس اللي بتتصاحب علي بعض ويحللوا الاحداث اللي في البلد
بيسلوا نفسهم


يا سلام علي طبق فول علي العربية بعد ما تصلي الفجر جماعة


ميدان رمسيس اللي زحمة ليل ونهار والناس اللي فيه من كل حتة وكل لون

رمضان وجماله في مصر ومدفع الافطار بتاعنا احنا بس,والمسحراتي


ياسلام علي صلاة في سيدنا الحسين ولا السيدة نفيسة وتقرا الفاتحة وتدعي ,جو تاني خاااااالص


الناس اللي بتفرحها خروجة علي النيل و شوية ترمس ,حاجة بسيطة بس الناس اخر سعادة بيها


سمعنا حاجة للست ثومة,ولا نروق باغنية لمنير

يا سلام علي صوت الشيخ رفعت وابتهالات النقشبندي

ماتش الاهلي والزمالك والخناقات المعتادة واحنا كنا احسن وانتو اتقطعتوا

ايس كريم في عز البرد وانت ماشي مع اصحابك في طلعت حرب بالليل .........مجانين

اما تسال حد عن عنوان ويصفهولك غلط,هو مش قصده يتوهك ,هو حابب يساعد بس يتكسف قول معرفش

الناس اللي تعملك خدمة ويقولك خلي بقي,لو خليت مش هيزعل اصلهم جدعان

المظاهرات اللي علي سلم نقابة المحامين وعساكر الامن المركزي اللي مش فاهمين مين دول


الناس الكبار ,دول بقي بركة وعليهم خفة دم

ايه

لسه فيه حاجات كتيرة في مصر الحقيقية

الناس هنا حلوين اوي