معارضة ايه وكلام فارغ ايه؟؟؟؟

تعالوا ولو لفترة التخلص من النظرة التشاؤمية الحاقدة الناقدة للبلد والحكومة المحروسة ورئيسنا اطال الله عمره والانجال الافاضل والاخوة كبار الدولة ربنا يكتر من امثالهم ,ونبطل نتحري السلبيات البسيطة جدا جدا جدا جدا -طولت عليكم-اللي تكاد تكون لا تري في مصرنا الغالية ونبص علي النواحي الايجابية الموجودة حولنا في كل مجالات من مستشفيات حكومية تدخلها سليم معافي تطلع -ده لو ربما كرمك وطلعت- عنك ايدز بقي او فيروس سي او ناقص كلية او الحاجات البسيطة دي ,او اقسام الشرطة والسادة الضباط رعاة الوطن حفظهم الله زخرا لنا وابقاهم ضاربين مهينيين ساحلين قاتلين للشعب الحقير اللي مش مقدر قيمة الخدمات والامن اللي هو عايش فيه,وياريت واحد متفائل يرغي شوية عن المصالح الحكومية واللي بيجري فيها من معاملة اسبيشيال وفايف استارز للمواطنين وخاصة الغلابة منهم والاقوال الماثورة زي (فوت علينا بكرة يا سيد),او (مناخير النسر مش باينة يا سيد) وتفانيهم في خدمة المواطن بسرعة لدرجة ان ورثة المواطن ممكن يلحقوا يستفيدوا بتلك الخدمة الجليلة يا سلام لو كان له ناس قراييييييييييب موهمييييييييييييييييين زي الحاج صاحب البيت بتاع فيلم جائنا البيان التالي, وتدخل بقي علي جامعاتنا الحكومية تلك القلاع العلمية الشامخة التي بلا فخر ولا تعرف اي حاجة عن الجامعات ولله الحمد والبركة في الدكاترة اللي همهم فقط المبالغ الزهيدة التي لا تكاد تذكر -اللي بتخرب بيت اولياء الامور-اللي بيدفعها الطلبة في الكتب اللي بعضها مايتفتحش اصلا يعني بيتجاب كرامة لسيدنا الولي وقولوا معايا مدددددددددد ,والله الواحد مش عارف يقول ايه ولا ايه من كتر الترف اللي الشعب عايش فيه دانا هاعيط من كتر الهنا اللي احنا فيه وتحيا الوحدة العربية .
امال بقي الناس الوحشين المغرضين الذين يطلق عليهم -ربنا يحفظنا -معارضن ,بتعارضوا اييييه انتوا مش شايفين ولا ايه ولا انتوا غاويين كلام علي الفاضي ده حتي حرام عليك يعني نعملكوا ايه اكتر من كده -مش انا ده الحكومة والوطني- ناقص بقي الوزرا تفكر ولا لا سمح الله يفتشوا علي وزاراتهم ومن يعملون تحتهم ويراعون الدقة في اختياراتهم ,ايه الشعب الطماع ده .
بجد بقي انا نفسي كل واحد شاف شئ ايجابي يحكيه ,انا عن نفسي لسه بصراحة مش فاكر دلوقتي حاجة كويسة بجد ,اللي شايف شئ ايجابي ياريت يدينا امل في الحياة .دعوة للمشاركة والدعوة عامة