Saturday, February 24, 2007

يوم مع احسن ناس


واخيرا وبعد عناء ,تقرر ان يكون اللقاء الشهري الثاني في البورصة ,مهما كان تفاؤلي فلم اكن اتوقع انه يكون بالجمال والحميمية دي
والله فعلا انت بتتكلم مع الناس كانهم عشرة عمر وكانك تعرفهم من زمن
كلمت ايمن راسبوتين واتفقنا اننا نتقابل في التحرير الساعة سبعة الا ربع,والراجل بصراحة عمل واجب تمام لانه ساب عربيته ونزل ركب المترو علشان يقابلني,ورحنا انا وهو علي مكان اللقاء
احلي ناس متجمعة
كان هناك سمراء النيل-اي حاجة بقي ودي طبعا حبيبة الكل ,وكانت قاعدة بتاخد فلوس الاشتراكات,وتجديد الاشتراك ,اتفقنا نخليها تقعد علي الترابيزة علشان لو البوليس جه يقولوا هيا الزعيمة
وياسمين سكاي لايت ,صاحبة الفكرة واللي بذلت جهد علشان تجمعنا كلنا,فكر متحرر وعقل كبير,وما شاء الله عليها عارفة طب وكانت بتجادل في الدكاترة اللي معانا انا اقترح عليها انها تقدم علي ماجستير علطول
الاب الروحي لينا بقي كان الرائع فعلا استاذنا حسني سليمان ,اللي جه بعد وصولنا بشوية,ما شاء الله عليه انا عجبتني جدا قدرته علي التواصل ,بصراحة يعني لو حد تاني في مكانه كان هيقول ايه العيال دي,انا ايه اللي هايوديني ,ومع اني كنت اصغر الموجودين لكني سعدت جدا بتركيزه واهتمامه بكلامي ,وبصراحة اداني ثقة في نفسي من اول الاجتماع, واول ما سمع اسم مدونتي بصلي كده وقالي اه انثي ,بجد بجد فنان راقي وعقلية واعية جدا
اما بقي الباشا اللي فرحت جدا بيه احمد شقير ,مش معقولة يا جماعة علي الرغم انه في بداية الاربيعينيات,الا انه عقل وروح شاب عشريني ,ايه الدماغ العالية دي ,انا غيرت مكاني علشان اروح اقعد جنبه,ومن اكتر الشخصيات اللي سعدت بيها
ايمن راسبوتين اللي فضل كده ساكت طول اللقاء ,شكله مباحث وكان هو اللي عمال يصور وفضل واقف
تقريبا علشان لو جت كبسة يهرب ,بس جه في الاخر وفتح بقي شاب ابيض جدا من جواه علي الرغم من صمته
حبيب قلبي بقي واللي حسيت انه صاحبي من زمان محمد باشا حامد ,اول مادخلت عليه فعرفني بنفسي فروزن لف,قولتله بتاع تامر حسني قالي اه قولتله حبيب قلبي ,محمد عاقل جدا ودمه خفيف جدا وضحكته رائعة
ومحمود باشا صاحبه اللي ان شاء الله هيبقي مدون ,لا هو فعلا بقي مدون مع انه كان ساكت شوية كده
اسامة صاحب مدونة الدبور اللي كنت فاكره راجل كبير طلع شاب زي الورد راجل برضو بس سنه صغير,وموتني علي نفسي من الضحك حتة سكر ودكتور قد الدنيا ,ويا سلام بقي علي طرائفه التحكيمية لما كان حكم
ايهاب باشا صاحب مدونة ايجلز اللي تولي مسئولية دفتر الحضور واللي جمع فيه اسامي ولينكات المدونين ,شاب طيب جدا ومتحمس للتدوين ولفكرة الاجتماع
اما بقي ايلاري صاحب مدونة حد فاهم حاجة فده من الناس اللي دماغهم كيفتني بصراحة متحضر جدا ,بيحترم الاراء ,اقترح اقتراح حلو اوي وهو اننا نعمل يوم للصداقة ,معلش بقي يا مان انا اعترضت لان عيد الحب بتجيب فيه هدية واحدة لكن عيد الصداقة هتجيب كام هدية بقي,انا اهزر طبعا,ياريت الفكرة تتنفذ ,بجد ايلاري انسان محترم اوي,ومن الناس اللي شجعتني برضو
والفنان المستقبلي بقي احمد حداد ,بيحب التصوير جدا وهو موهوب فعلا ,شاب اول ما تشوفه تحس انه صاحبك الانتيم بسيط في تعامله فكره كبير,
عنده خبرات كتير متحمس برضو للتدوين جدا من الشخصيات العزيزة جدا عليا , واهم حاجة بقي اننا روحنا مع بعض ههههههههه
محمد مدونة مصر هي امي جنني بصراحة مش عارف ازاي واحد يجمع بين البساطة لدرجة فظيعة والفكر المستنير جدا جدا ,محمد مبتسم دائما اما بيتكلم تلاقي شخص مثقف جدا واسع الافق بيتكلم معاك ,وبرضو طيب اوي اوي ودمه خفيف جداجدا
بيشوي ذي الاين اللي كان هادي اوي في الاول ,لكن بعد فترة لقينا شخص تاني ,حد مخه كبير بيتكلم بطلاقة ,وافكاره مترتبة بيبحث عن الصداقة والعلاقات في حياته,مع انه بيتواصل حلو جدا بس الظاهر انه حظه وحش مع الناس
واللي كنت اوي هازعل اوي لو ماجاش مايكل محسن ,خريج الاقتصاد والعلوم السياسة ,اللي مش لاقي نفسه في الشغل لسه,وكان نفسه اتعرف عليه من زمان ,شخص متفتح اوي وفكرة كويس جدا
واللي كان مضهدني جدا ابراهيم معايا مدونة انا وانا ,ههههههههههه ابراهيم بيكتب قصة وعضو جماعة مغامير الادبية ,امتني له التوفيق ,ابراهيم
مش بيتكلم كتير ,يعني علي قد السؤال بس ,بس برضو فاق في الاخر واحنا مروحين
قابلنا عدد من المدونين لكن لم يسعدني الحظ لكي اتعرف عليهم من قرب وهم محمد رؤوف صاحب مدونة كلمة
وصاحب مدونة كيف تحيي الموتي اللي افتكرني بنقل الحاجات عاااااااااااااااااااااااااااا والله يا باشا انا اللي كاتبها كلها
يوم اكثر من رائع ان شاء الله الاجتماع الشهري هيبقي اول جمعة من كل شهر ,بس هنفوت شهر مارس
ياريت كل المدونين ينورونا ,والي حضروا الاجتماع سعدت جدا بيكم كلكم ,واحترامكم للافكار والاشخاص وتقبلكم لي علي الرغم من اني اصغركم سنا
*ترتيب الاشخاص مالوش دلالة معينة يعني اللي جه في بالي
حسني سليمان
احمد شقير
ياسمين
حد فاهم حاجة-ايلاري
محمد
اسامة
بيشوي
ايهاب
ابراهيم معايا
احمد حداد
محمد حامد فروزن لف
مايكل محسن
ايمن فاروق
محمد رؤوف
كيف تحيي الموتي
سمراء النيل

Wednesday, February 21, 2007

وفيشت الهوامش



نياهههههههههههههههههههها
عقبال عندكم كده اما تفيشوا
ولمن لا يعرف التفيييش فهو سيادتك صحفية الحالة الجنائية ,اللي هي بالبلدي الفيش والتشبيه
تقولي سموها فيش ليه اقولك والنبي ياخويا ماعرف
انا رحت الصبح علي القسم علشان اعملها
وعلي فكرة انا بحب اروح القسم اوي مع اني ما روحتش غير مرة قبل كده علشان استخرج البطاقة الانتخابية
والحمد لله مطلعتهاش
ودي المرة التانية
اصلي بحس اني رافت الهجان في الموساد الاسرائيلي
بيجيلي احساس اني في مقر الاعداء
المهم توكلت علي الله وشديت علي القسم الساعة تسعة الصبح,علي الريق كده
هي الوصفة كده لازم علي الريق
المهم رحت وانا داخل لقيت اخ مش عارف بقي هو ايه شغلته بيقولي ايوه يا كابتن
كابتن يا فتاح عليم يا رزاق يا كريم
هانبدا بمشكلة ,معلش بقي عديها يا مان لسه اليوم طويل
كابتن كابتن مش مهم,قلتله عاوز اعمل فيش
قاللي اشتريته
قلتله اشتريت ايه ياعم بقولك انا عاوز اعمله
قالي روح اشتريه من البوسطة
اوففففففففففففففففففففففف
ماشي
رحت البوسطة
عاوز فيش لو سمحت
قاللي مفيش غير عادي
قلتله هو فيه عادي ومش عادي,سوبر كومبو يعني ولا ايه
قالي لا فيه مستعجل بس خلص,هات ياعم العادي وخلاص
رجعت للراجل اللي طلع عسكري
قلتله وبعدين,قاللي تجيب طوابع شرطة من القسم جوه,دخلت لقيت واحد سبحان الله عنده فراسة
لقاني طالع السلم قاللي هنا اهه - نظرتهم ثاقبة فعلا-المهم اخدت الطوابع ولصقتهم علي الفيش
ورحت بقي علي باب كده جنب القسم هو ده اللي فيه التفييش
قالو صور البطاقة,صورت البطاقة والراجل بتاع المكتبة اداني ورقة كده مالهاش لزمة
ضحك عليا وخلاص
المهم مليت الورقة ودخلت ,علشان اتفاجا بطابووووووووووووووووووووووووور
الله الله ,مصر كلها بتفيش ,قلت عادي مش مشكلة هاتعدي المحاضرة لسه الساعة 11 هالحق ان شاء الله
وبدات رحلة المتاعب,اول نص الساعة الطابور متحركش خطوة,وبعدين بدات تندع
وانت واقف ممكن تلاقي واحد جايب عسكري وتعدي كل الطابور ودخل خلص ومشي
وواحد باعته الباشا النايب-اللي هو نائب المأمور-دخل برضو وخلص
وواحد ادي الموبايل بتاعه للموظف ومش عارف مين كلمه راح مخلص مع انه والله كان شكله مسجل خطر
وكان واخد حوالي خمس ست غرز كده بس عادي مش مشكلة
النيلة بقي اني لما قربت من الشباك كان فيه واحد دخل برضو من غير دور,الازمة مش في كده ,الازمة سيادتك انه تبع قسم العاشر من رمضان
يعني تبع محافظة الشرقية,يعني مينفعششششششششششششششششششششش
بس بما ان اخو جنابه كان شغال في القسم مش عارف شغال ايه ,نفع الموضوع وظهرت عبقرية المصريين
كل ده كوم ووائل كوم تاني,تقولي مين وائل اقولك معرفش
سبحان الله تلاقي الواحد من دول دخل ,تسال مين ده ياعم يقولك تبع وائل
والله حوالي اربعة خمسة علي كده
مين وائل بقي اهو ده اللي نفسي اعرفه
ومن موقعي هذا بشكر السيد اللواء حبيب العادلي علي اهتمامه بالمواطنين ,وعلي خدمتهم وتوفير سبل الراحة
وانا الحمد لله وقفت ساعتين,وملحقتش المحاضرة,والحياة زي الفل
بس برضو مين وائل ده

Thursday, February 08, 2007

انقذوا الاقصي.................انقذوا ماتبقي من الكرامة




المسجد الاقصي يدمر




اعتداءات متجددة




لكن الفارق اننا في المرات السابقة كنا نشجب ونعترض




لكن هذه المرة لا شجب ولا اعتراض




اكتفينا بالصمت المخجل




لا اجد كلاما لاعبر به




فقد مللنا الكلام




بل ملنا الكلام




وكره حروف




العين


والراء


والباء




ضاع الكلام


حتي وان لم يصل صوتنا


يكفينا اننا حاولنا


وابرائنا ذمتنا امام الله




دعوة للاخوة المدونين لتصميم بانر للاعتراض



انقذوا الاقصي........انقذوا ماتبقي من الكرامة


للمتابعة يرجي زيارة






تعديل 10-2

تم اضافة صورة للمسجد الاقصي

اما الصورة الثانية لمسجد قبة الضخرة حتي يزال اللبس

وشكرا لكل الاصدقاء الذين نوهوا علي ذلك الامر

Friday, February 02, 2007

الواوا اح






انا قلت بقي بما اننا اصحاب والمفروض نتشارك في كل حاجة,فقلت يا واد اشمعني انت دمك يتحرق واصحابك المدونين لا,والمشاركة واجبة ولا ايه
المهم ماطولش عليكو قولو طول,السبكي عامل فيلم لهيفاء ماشي هانبعلها لكن يقول عليها فنانة ذكية وخطواتها محسوبة,
ايه اللي فننها ياعم الحاج الواوا اح ولا رجب حوش صاحبك
اصل كلام في سركم صاحبه ده كانت نيته مش كويسة
وكان بيبص لهيفاء نظرات مش بريئة مع انها حشمة والنبي حشمة
المهم بقي المعلم السبكي في لقاء مع سعادته في البيت بيتك مع المذيع -اللي كان متغاظ زيي بالظبط كده-محمود سعد
يوم الاربعاء31 يناير
محمود سعد ساله طب الفيلم قصته ايه يا سبكي ولا نوعه يعني استعراضي ولا ايه
قاله دي اسرار -اصلها هيفاء يورانيوم-ممكن اعمل فيلم استعراضي او تاريخي او ديني
خبر الموسم
هيفاء تعمل فيلم ديني
بس تصدقوا ممكن والله
اه
تعمل رباعة العدوية بس في نصها الاول
ايام الرقص والذي منه
ده اخرها


قال وايه
هيفاء تستاهل اكتر من اتنين مليون دولار
لييييييييييييييييييييييه
رونالدينهو
بس لا يا فالح هي احسن
رونالدينهو بيرقص 11 لاعب
دي بترقص الشعب
ولا عزاء لانغام واصالة وسميرة سعيد
مهم لله خلوني رحت تاني لدكتور المرارة