مجزرة كلية التربية-جامعة عين شمس (تكرار لسيناريو الانتخابات والبلطجة)

الاحداث اللي هاحكيها حدثت كلية التربية جامعة عين شمس يوم الاثنين الموافق 30اكتوبر 2006 .
الوقائع اللي هارويها دي بس اللي انا شفته بعيني مش نقلا عن حد,واحب اوضح نقطة مهمة انا مش مع اي طرف من الطرفين سبب المشكلة.
تبدا الاحداث لمانزلت اليبيت علشان اروح الكلية الكلام ده كان الساعة حوالي 12.30وصلت الكلية لقيت عربية امن مركزي واقفة في شارع جسر السويس ,دخلت الكلية من باب جسر السويس وان داخل لقيت حركة غريبة في عشائر الجوالة ولقيت شوم وعصيات وناس شكلها غريب انا اللي جه في بالي انهم شباب بيهزروا ,لقيت نقيب امن مركزي جاي من جوه الكلية فقلت يبقي الموضوع خلص خلاص ومفيش حاجة .
دخلت الكلية لقيت طلاب الاخوان المسلمين عاملين زي مؤتمر في ملعب السلة وجايبين ساون وعاملين اسكتشات والامن واقف وطلاب الخوان رابطين عصابات سوداء علي رؤوسهم .
دخلت سلمت علي اصحابي وقلت اروح اشوف موبايل فيه كاميرا الزووم فيها عالي علشان اصور كام صورة انزلهم في المدونة خدت موبايل من واحدصاحبي ورحت عند عشائر الجوالة لقيت شاب -انا مش بقول طالب لان بعض الاشكال شكلها مش طلبة-صورت بعض الملصقات للاخوان ورحت اصور الناس اللي معاها الشوم لقيت واحد منهم واقف علي باب العشائر بييتكلم في الموبايل وبيقول:تمام يا باشا ,كله في التمام واحنا جاهزين ,هو ده اللي انا فاكره من الحديث بس كان معناه ان في حاجة هاتحصل.
قلت ده مش وقت تصوير جريت وقولت اروح لرئيس الحرس اللي كان واقف مع باقي الضباط عند مؤتمر الاخوان
انا:صباح الخير يا فندم.
سعادته:صباح النور.
انا:فيه ناس يافندم معاها شوم وعصيان وشكلهم كده مش من الكلية وكده هايبقي فيه مجزرة
سعادته:انت مين؟ (هو شك ان انا من الاخوان علشن ذقني طويلة شوية)معانا في الكلية؟انا اول مرة اشوفك؟وريني الكارنيه
اطلع علي الكارنية بتمعن شديد واتاكد انه مش مزور.
انا :يا فندم حضرتك ممكن تروح تشوف بنفسك او تبعت حد من الضباط.
سعادته: فين
انا :في العشائر يا فندم
سعادته:يعني تبع مين
انا :بتوع الاتحاد وشكلهم ناوين نية مش كويسة للاخوان.
سعادته:سيبهم يضربوا بعض ويشير بيده فيما معناه مش مهم
انا :بس دي هاتبقي مجزرة
سعادته :علشان اما واحد منهم يتعور ويروح لاهله يسالوه من ايه ده شوف هايقولهم ايه
يعني انت عاجبك اللي بيحصل ده من طلبة الاخوان
انا :حضرتك انا لا باحب الاخوان ولا طلبة الاتحاد بس دي هاتبقي مجزرة
سعادته:سيبهم(طب اروح لمين ينقذ الموقف اذا كان الامن بيقول سيبهم).
وبدا يتكلم عن ان الجامعة للتعليم مش للمظاهرات والتعبير عن الراي وجري بيننا حديث لمدة حوالي عشر دقائق اخذ يشرح فيها وجهة نظره وكان بيحاول يوضح انا النسان يؤدي فرائض ربنا ويكون مؤمن وانه يتغير من داخله,هو انا مع اعتراضي علي بعض نقاطه لكن المجال ماكنش يسمح بالمناقشات,واثناء الحديث بدأت الاحداث الجسام زي مابيقولوا
طلاب الاتحاد ومعاهم الشوم والعصي اتجهوا لمقر مؤتمر الاخوان حيث كنا نقف(انا ورئيس الحرس) ووقفوا مواجهين لطلبة الاخوان اللي بدأو الهتاف (الله اكبر الحمد لله).
فضلوا واقفين حوالي خمس دقائق وطلبة الاخوان بيتجنبوا الخناق فبدا بعض طلبة الاتحاد في الضرب فرفع طلبة الاخوان ايديهم الي فوق ثم رددوا نفس الشعار وفي لحظة بدات المجزرة وكله طاح في بعضه زي خناقات القهاوي القديمة في الافلام العربي ,طلعت علي كرسي وقفت اتفرج حسيت بالعار والطلبة بتضرب بعضها في الجامعة كانهم بيحاربوا اليهود ومع تخاذل الامن اللي دخل مكتبه وعميد الكلية-والكلام ده منقول علي لسان احد الاشخاص-قفل كتبه علي نفسه.
لقيت واحد صاحبي معاه موبايل واقف جنبي رحت واخد منه الموبايل وبدات اصور بعض المشاهد بس للاسف كانت مش واضحة لان الكاميرا مش عالية الجودة لكن اديني حاولت اقتربت من موقع الحدث وحاولت اوصل لاقرب صور ممكنة.
شد انتباهي صوت صريخ بعض البنات بصي ورايا لقيت بنات من الاتحاد بيتخانقوا مع بنات من الخوان وتقريبا ماسكين في بعض ,رحت مصور علطول ,شافتني وان بصور بنت فصرخت "انت ياللي بتصور البنات" فجالي واحد من طلاب الاتحاد السابقين وهو خريج اساسا طلب مني مسح الصورةانا في الاول قولتله اامسحها ليه,قاللي:علشان دي بنت.بصراحة انا شفت انه مهما كان ان مرضاش ان اختي تتصور علي الرغم انها طالما سمحت لنفسها انها تتخانق يبقي انا من حقي اصورها لكن برضو هي بنت وفيه بنات كتير مالهمش دعوة طلعوا في الصورة قمت ماسحها (هي دي بقي المتاعب اللي بيقولوا عليها ).
بدا المقتتلون يتفرقوا وتجمع طلاب الاخوان جنب بعضهم وتحركوا علي شكل صفين الي خارج الكلية من ناحية باب روكسي .
هي دي تعتبر نهاية الاشتباكات اللي حصلت لكن اعتقد ان الموضوع ماخلصش كده.رحت اصلي العصر في المسجد المواجه للكلية انا واصحابي بعد الصلاة كان بيصلي امامي نقيب امن مركزي شاب ,فقام علشان يخرج قمت وراه وهو رايح علي باب المسجد ناديت عليه:كابتن... حرما
النقيب:تقبل الله وسلمت عليه
انا :حضرتك امن مركزي,صح؟
النقيب:ايوه
انا :امال انتوا فين مابتخلوش الكلية؟
النقيب:لا
انا :ليه امال المجرزة اللي جوه دي مين يحوشها
النقيب:ده جوه فيه هدوء(شكله مش من هنا)
انا :هدوء ايه هو انت ماشفتش الناس اللي خرجوا متعورين ومتشالين وماشوفتش الشوم والعصيان؟
النقيب:شفت بس كله ده ليه؟
انا :علشان الانتخابات
النقيب:هي النتيجة امتي؟
انا :الانتخابات لسه ما حصلتش اصلا ده كل اللي حصل علشان بطاقات الترشيح
النقيب:طيب
وانتهي الحديث عند هذا الحد ودخلت الكلية تاني بس ماحصلتش احداث مهمة بعد كده
الكلام ده انا عشته بنفسي ومافيش اي كلام منقول عن اي حد,وباكرر انا مش مع الاخوان ولا اتحاد الطلبةانا حسيت ان اللي حصل ده لازم يتعرف ويتنشر للناس علشان يعرفوا الدنيا فيها ايه.
انا باعتذر عن عدم نشر الصور الان لان الصور علي موبايل واحد صاحبي وماعرفتش اخدها ساعتها بس ان شاء الله في اقرب فرصة انا هانشر الصور هو بصراحة حظ وحش علشان انا ضاعت مني الفرصة بس تمكنت من التقاط بعض الصور .
رجاء من اللي شاف الحدث ده وعنده اي اضافة يبعتها علطول واي حد شايف حاجة غلط في الموضوع وماحصلتش ياريت يبعتلي.واللي عنده اضافات -رجاء-يبعتها.
وشكرا ليكم

كل واحد وفانوسه

فاكر فيلم اسماعيل ياسين والفانوس السحري .....عمرك ما حلمت بالفانوس؟ اكيد حلمت لان كلنا حلمنا بيه ,ممكن نقول ان احنا نفسنا ننحقق كل احلامنا وماظنش ان في حد مابيحلمش او نفسه يحقق احلامه والاكتر من ده السهولة في تحقيق الحلم .المهم قولي حلمت بايه او فكرت في ايه هاتطلبه من العفريت اللي هايتطلعك من الفانوس ويقولك شبيك لبيك اتجعص واتمنظر ..واطلب واتنقعر ؟؟؟؟؟؟؟
فكرت ؟؟طبعا غير الفلوس الكتير -بتاع 1315 جنيه-ولا العربية الجامدة وحلمك انك تتجوز البت اللي بتحبها او تتجوزي الواد اللي باب رفضه عشان لسه طالب ومتكحرت والحياة دلوقتي مش عنب خالص .حاولت تفكر في الاحلام غير الفلوس و الحاجات دي .يعني فكرت مثلا انك تبقي رئيس جمهورية -يوووه ما قلنا بلاش سياسة-خلاص نغير الموضوع. يا تري حلمت انك لو اتخانقت مع ابن لواء شرطة هتاخد حقك في القسم؟ولا مثلا لو اتمسكت في مظاهرة........طب وتتمسك ليه اصلا طب ماتحلم انك تتظاهر وما تتمسكش ولا تتسحل ,
حلمت انك تخلص من تناكة السادة المبجلين امناء الشرطة؟
حلمت ان انك تخلص من حرس الجامعةاللي بقوا حاكمين الجامعة؟
حلمت انك تلاقي حاجة اسمها اتحاد طلبة بجد مش وطني وطني وامن دولة؟
حلمت انك مايبقاش فيه سرور ولا شاذلي ولا صفوت ولا عزمي؟ يوه فاهميني غلط دول جماعة اصحاب بس بحبهم قوي
حلمت بمجلس شعب حقيقي حقيقي حقيقي (والله الامنية دي انا اكتفي بيها لو تتحقق)؟؟؟؟؟؟
حلمت بانتخابات نزيهة(ده الضرب والخناق وصل لانتخابات اتحاد الطلبة في الكليات)؟؟؟؟؟
حلمت ان الزمالك يكسب الاهلي؟؟؟؟؟؟؟؟؟؟؟انا حلمت مع ان انا اهلاوي بس زهقت خلاص من كتر الفوز
حلمت انك تخلص من الطورائ؟؟؟؟
تخلص من بوش ؟؟؟؟
يكون عندنا نظام تعليم محترم؟؟؟
جامعاتنا العريقة تبقي من احسن جامعات العالم؟؟؟؟
ان االناس يرجعلها الذوق اللي اختفي من البلد مش عارف ليه؟؟؟(باستثناء البعض طبعا)
المترو ييجي في معاده؟؟؟؟
كلية الشرطة ماتبقاش بالكوسة؟؟؟
حلمت...........لا كفاية كده هو انا لوحدي اللي باحلم كل واحد يشوف لو الفانوس طلعله هايطلب ايه,هاستني اسمع احلامكم
شاركوني وكل واحد وعفريته

ايه الحكاية.....................الحجاب كمان مرة

معلش بقي يا جماعة احنا منضطرين نرجع مرة اخري لموضوع الحجاب اولا انا يا جماعة سمعت الدكتور علي جمعة مفتي الديار المصرية في حلقة من برنامج البيت بيتك اتصلت به بنت تساله عن الحجاب فقال لها"الحجاب فرض وان اللي مش عاوزه تلبس الحجاب ده من حقها لكن ماتقولش حلال ولا حرام ".
وبعدين الازمة وانا قلت قبل كده مش حتة قماشة فوق الشعر لا مش هي دي الازمة, الموضوع التزامات بتتبع ارتداء الحجاب وموضوع الحلال والحرام ده مش بتاعنا احنا, فيه ناس متخصصين للكلام ده وده شغلهم مش من حق اي انسان انه يحلل ويحرم علي مزاجه وانا في التدوينة اللي فاتت ماكنتش اقصد اني احلل او احرم انا كنت باحاول افض اشتباك بين ان كل المحجبات متخلفات وغير المحجبات مودرن واستايل والثاني ان كل المحجبات جديرات بالحجاب وان كل غير المحجبات غير محترمات هي المسالة مسالة تفاوت واختلاف وكل مجموعة فيها الكويس وفيها الوحش.
لكن انا من وجهة نظر شخصية مع الحجاب لكن مش ضد اللي مش محجبة,فيه بنات مش محجبات واحسن كتير كتير من بنات محجبات وفيه بنات محجبات عاوزين الولعة .
واخيرا الموضوع ده موضوع من المواضيع اللي فيها كلام كتير وانا هاحاول اجيب راي الدين فيه وعموما انا جبت رقم الفتوي من دار الا فتاءوهو4065 ارجو الاطلاع عليه
فلتحيا الديموقراطية ويحيا اختلاف الرأي لكن بشكل حضاري واي اختلاف هو علي الرحب والسعة
ويجعله عامر

ايه الحكاية................الرجالة فين

بص ياسيدي في كل لقاء صحفي او تليفيزوني او حتي راديويي نجد السيد الرئيس حسني مبارك يطل علينا مجاوبا علي سؤال طرح عليه لماذا لم يختر سيادتكم نائبا للرئيس او لماذا لا تترك الحكم؟؟؟؟؟؟؟؟؟؟؟؟؟؟؟؟؟؟وطبعا قال يعني الصحفي ولا المذيع ماعرضش السؤال علي الرئيس مرورا بسبعتاشر لجنة من لجان الحزب الوطني المهم تلاقي السيد الرئيس قام معدول في قعتده وشبك صوابع ايديه زي العادة ويقولك ايه قال مالقيتش لسه اللي ممكن يمسك مصر من بعده !!!!!!!!!!!!!!!!!!!!يا نهار فل بقي جمهورية مصر العالمية من اسكندرية لاسوان ومن السلوم لرفح مافيهاش راجل ........زي فؤاد المهندس ماكان بيقول مافيهاش بيبي مافيهاش بيبي !!!مصر مصر بقالها 25 سنة يعني ربع -ارن-ماجبتش شخص ما يمكن بطريقة ما ان يحكم مصر ليييييييييييييييه طب حد يقولي هل يعقل ان مصر بلاش مصر انجولا ماجبتش مواطن يمكن تولي زمام المور في دولته طب ازاي يعني !!!!!!!!!!!يعني مصر اللي جابت مينا ورمسيس وعمر بن عبد العزيز والليث بن سعد والشعراوي ومحمد عبده وسعد زغلول وعرابي ناصر والسادات .........اكمل لا اكيد انتوا عارفين الياقي مش عارفة تجيب راجل راجل بمعني الكلمة مش المقصود ذكورة لكن ابن مصري يقدر يشيل الهم عن السيد الرئيس ويريحه زي ماهو بقاله 25 سنة مريحنامانا عاوز اعرف برضه طب لاقدر الله لو حصل اللي في بالي-انتو عارفين طبعا-هاتبقي حوسة هانبعت نستورد واحد صيني ولا اقولكم نستورد ليه شارع عبد العزيز زي الفل والبضاعة الصيني المضروبة مالية البلد يبقي نشتري واحد صيني يحكم البلد !!!!!!!!!!!!مش مصر مافيهاش رجالةوعجبي

ايه الحكاية..............الحجاب

الحجاب.......ايه الحكاية؟وايه مشكلة الناس مع الحجاب والمحجبات هو احنا في فرنسا ولا في تونس .اللي خلاني ابدأ بموضوع الحجاب اني صادفت في مدونة لبنت انها بتحكي عن مشاكلها في رمضان لانها مش محجبة وبيحصلها مضايقات في المترو. اولا علشان مانتعبش نفسنا الحجاب فرض علي كل مسلمة وطبعا ده مافيهوش جدال واللي عاوز يسفسط يروح بقي يجادل في دار الافتاء.لازم نعرف انه فيه فرق بين انه حرام وان انتي مش مقتنعة بالحجاب يعني تبقي عارفة انه الحجاب فرض بس انتي مش عاملاه زي اللي مش بيصلي عارف ان الصلاة فرض بس هو مش بيصلي لكن ماينفعش يقول ان الصلاة مش فرض او دي حرية شخصية.يبقي دي اول نقطة الحلال بين والحرام بين وانت حر تختار اللي يريحكالنقطة الثانية ليه شايفين كل المحجبات متخلفات وان الحجاب رجعية وا الشعر المطلق دي حاجة فل وسبور اللي مش محجبة بنت كوووووول وهي اللي فيهم والباقي سلطة .بنات كتير محجبات وشيك جدا وستايلش وبيلبسوا علي الموضةبس في حدود الاحتشام والمسالة دي نسبية تتفاوت من وسط لاخر ومن عقلية لاخري يعني وصلنا ان المجبات مش متخلفات زي بعض الناس ماهي شايفة النقطة الثالثة:للانصاف برضه ان مش كل البنات اللي مش محجبات مش محترمات .يعني فيه بنات مش محجات ومحترمات جدا وفيه بنات محجبات وفي منتهي السفالة تلاقي واحدة محجبة ولابسة بنطكور تحت الركبة بشوية-شرعي يا جماعة ماحدش يفهم غلط-يبقي ايه لزمة الحجاب ولا تلاقيها قاعدة في الجامعة ناقص تقعد علي رجل صاحبها..0يبقي وصلنا ان كل فئة فيها الكويس والوحش ..........لكن نرجع برضه ايه المشكلة تكوني محجبة ملتزمة يعني انتي مش محجبة ومحترمة وزي الفل طب ماتنفذي فرض ربنا وبرضي تكوني محترمة اصل الحجاب مش حتة قماش فوق الشعر وخلاص الحجاب يتبعه التزامات للي لابساه..اللي يغيظ اكتر بصراحة وبينرفزني السيدات والبنات اللي بتجادل ان الحجاب مش فرض انتي مش محجبة خلاص اسكتي لكن تقولي ان مش-مكتنعة- بالحجاب طب والله نقنع سموك ازاي انتي مش مقتنعة بحكم ربنا يبقي دي مشكلة سيادتك ..مرة في برنامج البيت بيتك بعد ما حنان ترك اتحجبت استضافوا كاتبات منهن اقبال بركة كانت بتتحدي الحجاب زي مايكون الهولوكست .....ماتهدي يا حاجة شوية اذا بليتم فاستتروا يعني غلطانة وبتجادلي في الغلط وتقولك استفتي قلبك طب استفتي قلبك في ايه ؟؟؟؟؟؟يعني ممكن نستفتي قلبنا في الصلاة يعني انا النهاردةماليش مزاج هاصلي ظهر ومغرب ولا يمكن ماقتنعش بالصلاة ما هو كل واحد وتعليمه .هما دول اللي اتخذوا الههم هواهم فضلوا عن سبيل الله .علي فكرة المسالة مش تشدد لكن انتي مش لابسة حجاب انتي حرة لكن ماتقوليش الحجاب مش فرض واتقوليش ان المحجبات متخلفات ورجعيات.....وربنا يهدي ويجعله عامر